(O dikhimasko than, perdal kerdyol sar ando trito rang, kashtalo kimpeske. Adam, pale sar terno, inke zangardes lindratar, avri ushtyavel andaj kolyiba taj anda muj dikhel krujal. E Eva andre sovel. Lucifer mashkaral tordyol. Abdyome kham.)

ADAM
Rutome mosuri, oh, kaj sanle?
Krujal mande, sogodi trajil, asal,
Sar muklom, muro jilo phagerdyilas.

LUCIFER
Kolo manush! Ta kodo doros,
Hoj la lumake butya te boldenpe,
Nyevo cherhaj te abjol ande tyi ret,
Te izdral e phuv, jekh kermo, te xasajla?

ADAM
Suno dikhlom numa, vaj akanak
Lav suno, taj mandar maj but si,
Sar suno, o trajo, pe ekh minuth
So po mulo materija hural, hoj
Kethane kodolesa te puterdyol?
Sostar, dikhas e khancheski dar? -

LUCIFER
Roves? - numa o bi tromipe
Astarel bi marimasko e
paguba, so shaj krujil avri.
Ba, le egoreske sakana
Alfabeto hodines dikhel taj
Na chungarel andale o zuralo,
Kodo dikhel numa, sar shaj
Tordyol inke vi telale.
Kasavo agor si pa historija,
Tu numa traba san, kon tradel angle. -

ADAM
Na, na, xoxaves, o kam slobodoj.
Avri mollisardom me mange,
Tele phendom pa paradajchi.
But sityilom paj sune musuri,
Xoxatyilom butivar, taj akanak
Mandar moll, pe drom sar te zhav.

LUCIFER
O bisteripe taj o sakana,
Patyape tena te avlas le
Agoresko shuk, hoj zhi o kaver
Sastyarel e phugnyi, kako colo
Cirdel po milno, taj phenel:
Shel tromake andre peline,
Taj tu aves baxtalo, kon perdal
Xutyesles. Ba, diklan, chaches,
Sar zhanari, pala but sogodi
Vi porrange kermes, savo numa
Andej muca zhanel te trajilpe,
Taj lesko barimoski vrama,
Inke ando shimijako pherel.
Chi jekh, chi kaver shimijako
Naj pe kodo kikido, te hatyarel
Mucake, vaj chirjake vundyi,
Taj te si samako, avri krujil,
Sar phuro kana mukel pesko kher.
Dapol bi mishkime kris lel sama,
Hoj katyi te ales e dushmanos,
Sode trubuj, hoj pala miji bersh
Inke vi o kolo te trajil pe luma. -
Chi o manush naj korkoro tele
Phanglo, ba o intrego, na inkrel
Leske veringa; o duhope, sar
Shordyipe astarel, adyes andak
Traba, tehara anda kaver butyi.
La jagake avla lako praho,
Taj avla kon prassavo kerna. -
Taj kon cirdela le numeri,
Maj dikhesa le trajosko zhape,
Savo tomnipe, meripe, bezex, taj
Zor anomesa ingrel, patyamo,
Dijajlimo, taj pesmudarimo. -

ADAM
Turdyuv! sosko buzho si ande tyo
Shero, shaj vladij inke, Devla,
Vi tusa. Ba, shelvar phenel o trajo:
Kattyi trajin, avri asavles, taj
Te faj man, ta chi trajil.
Na korkoro som pe kaj luma?
Anglamaj luma, telal gropa:
Jekh xutyimo, sar paluno rang…
Taj phenav, agor si la komedija. -
(O Adam karing e bar zhal, e Eva avri ushtyavel pa vudar.)

LUCIFER
Ah, gataj, gataj: che dili vorbaj!
Apol na sako minuth agor haj
Angloj? Dikhlan varisode miji bersh? -

EVA
Adam, sostar garadyilan mandar kade,
Tyo aguruno chumid shudrojlo,
Taj gindo, vaj xovji si, vi akanak
Pe tyo sham. Kade darav tutar…

ADAM (zhal maj dur)
      Sostar phires palama,
So dikhes pala muro paso?
E murshes, kadala lumake rajes,
Vi kaver butyi si, sar dremezdija.
Zhuvji, na hatyarel, ke pharopej, numa.
(kolyoltar)
Sostar chi sutan inke ekh pikko:
Maj pharo avla aba o postyimo,
So, la teharake kamav te anav. -

EVA
Te ashunesa man, maj mishto avla,
Ke so zhi akanak nas chacho,
Abakanak avela lashi: tehara. -

ADAM
Sar?

EVA
Zhanav, asajvela tyo muj,
Te pheno. Ta av maj pashe:
Dejake hatyarav man, oh, Adam, dejake.

ADAM (pe changa del)
Raja, tele pizdan man, eta ando
Praho som, bi tyiro, tusa ive
Maravma: vazdema, malavma, putrav kolyin.

LUCIFER
Kerme! bisterdan tyo barimo,
So mange shaj najisis. -

ADAM
Mukh kodo!
Kolo dikhimo sas; kado hodinaj!

LUCIFER
Haj tu romnye, phen so phutyarestu?
Tyo shav, vi ande mandyin bezexajlas.
Kodo anel pe tyi phuv, bezex, chorimo.

EVA
Kade te kamel o Del, avla kaver,
Kon muntuja o chorimo,
Phralipe andes andej luma. -

LUCIFER
Chingar keres pema, sluga?
Opre anda praho, pedo.
(Karing o Adam pruntyinel. O cheri puterdyol: o Raj luvudyijasaj, le anzheloncaj krujal sikadyol.)

O RAJ
      Ando praho, buzhe!
Anglama naj barope.

LUCIFER (bandyardes)
Armaj, armaj!

O RAJ
Vazdetu, Adam, na av brigako,
Ke shaj dikhes, mande lav tut pale.

LUCIFER (rigate)
Sar dikhav, kathe e fircija barol,
Shukar si le hatyarimaske,
Ba, la godyake sakana rucimoj.
Majfeder te shavman. (Zhaltar.)

O RAJ
      Lucifer!
Vorba si man tute, ta ashun.
Tu pale, muro shav, phen so azbaltut.

ADAM
Raja! zhungale sune phagrenas man,
Taj chi zhanav, soj andele o chacho.
Oh, phen, sosko trajo zhukarel pema:
Kaj cera vramaj sogodi mange,
Mashkar sost muro dyi uzharelpe,
Sar mol, kana avri uzhol, phares,
Pej phuv shores, te pela kermo?
Vaj o kuch pimo, maj lasheske kerdan?
Zhala muri fircija maj angle,
Maj uzhes, kaj tyo skamin te resel,
Vaj sar asavesko pedo, andre merel
Ando khinyipe, taj anda krujipe,
Ande sost phirel, chi zhanla avri
Te phagel? Si prajso le uzhe kolyines,
Saves prassal anda rat perajipe
O cino dohosko butipe? Sityarman,
Taj blagosa phiravav, ando than,
Ke pekado bi capenoj e rokovina. -

O RAJ
      Na mang
Maj dur e garady, so lashimasa
Garadas Develsko vast angla tyi jakh.
Te dikhesas, pej phuv nachipesa,
Hodinij numa tyo dyih, taj perdal
Bi agoruni vrama zhukarel tut:
O tinzojipe na avlas baxtalo
Majbut. Te dikhesas, o praho tyo
Dyih opre pel: so buzexijastu,
Anda bare buzhe, hoj pa nakhlo
Minutheski zang tele te phenes?
Inke akanak, tyi tehara perdal
Axtomes paj mugja, te bandyosa
Kathar tyi minutheski pharope,
Vazdel tut e biagoreski hatyar.
Taj kadaleske te astarlatu
E phutyar, tordyareltu o na lungo
Trajo. Taj avlatu barimo, zor. -

LUCIFER (asandos)
Chaches, pe sost ushtyaves, lasharimoj,
O barimo, e zor, avla tyo anglunipe,
Kaj duj alava, savo numa kade trupojpe,
Te avla paramicha, diskrimina taj
Bi zhanipe, kon kothe tordyola, gornyik. -
Sostar astardom manushesa baro,
Kon, chikatar, razatar, kethane shutoj
Po zhanimo pikoj, po korrimo, baroj. -

ADAM
Na prasa, oh, Lucifer, na prasa:
Dikhlom tye zhanipesko uzhipe,
Shil sas kothe kadale kolyines. -
Ta Raja! kon inkrela man opre
Te ashunav pe kado lasho drom?
Lan mandar o anglunipesko vast,
Hoj te zumavav e zhanipesko fruto.

O RAJ
Tyi musij, zuralij - tyo jilo uchoj:
Biagoreskoj o ajero, savo
Pej butyi akharel tut, taj mishto
Te lesa sama, ekh gilyi hurala tute
Bi nach, savi tordyareltu, haj vazdel tut,
Numa pala kodi zha. Taj te mucijape
Ande tyo pravardo trajo, cheresko
Alav, zhuvjako uzho dyih, dur
Kathar o marhipe, ashunela kodo,
Taj jilestar perdal, gilyi kerdyol.
Kaj, duje trabasa tordyol pe tyi rig,
Vi and chorimo, vi andej bax, sa jekh,
Zhutimangi, assamnyi geniusi. -
Tu pale, Lucifer, ekh angrustyi
Ande muro sogodipe - ker maj dur:
Tyo shudro zhanimo, tyo togodimo
Avla o trazimo, savo ando vrazdipe
Anel man, taj kolyarel - kodo so chi
Kerel - pekh minuth e manushes, taj
Maj palpale boldelpe. Ba, tyo bezex
Bi agoreskojlo, bi nach dikho, so
Kames te rumus. E shukareske, e
Uzheske, nyevo sumboro avlales. -

INZHERONGO GRUPO
Slobodes mashkar e bezex taj zor,
Te alosaras, sosko baro buzhoj,
Taj te zhanas, ke opral
Sastrij Develski ashtyin.
Ker tromasa, taj na bunun, kana
O butipe na avla blagopesa,
Ke na kodo dikh vortoske,
Numa leski shuk, kon baro kerel,
Lazhalpe te kerel kaversar;
Taj e lazhaveski vijaca
E nasules kaj e phuv karfinel,
E patyivales opre vazdel -
Apol pe tyi dromeski bax
Tena korrareltu o suno, ke
So keres, kodo pe Devleski
Luvudyijaj, tu keres, taj voj
Petu kikidyolas, sar pe trabi:
Dapol, inke tu les, lestar shuk,
Te mukela, te keres, ba lesko than. -

EVA
Ah, hatyarav gilyi, najis Devleske!

ADAM
Shajil vi me, taj zho palala.
Numa kodo agor! te shaj bistrosles! -

O RAJ
Phendem, manush: zurin, patyasa patya!