(O cheri. Amara phuvako kotor, dural dichol, sa maj cines, jokhar sar cherhaj szikavelpe, mashar le majbut. E rang dopash ando tunyariko lelpes angle, anda soste korro tunyariko avla, lokhes. Adam, sar phuro, le Lucifer esa huran.)
ADAM
Amaro hurajimo, phen kaj ingrel?
LUCIFER
Ta chi dorosajlan, kathar o gunuj,
Opre and maj lasho kruja, kathar
Mishto te hatyardomtu, nyamosko
Buzho vorbi ashundan?
ADAM
Kodo chaches, numa
Chi gindisardom shudreske lende
O drom. Kaj placo, kasavo pustoj,
Strejnoj, sar bezexalo te phirlas
Ande lest, taj ande muro dyih, duj
Hatyarimo zuril: hatyarav, ke che
Khancheskij e phuv, kaj tele phandel
Muro ucho duho, me dorojtar latar;
Ba, palpale rovo, dukhal, kaj
Shindyilomtar. Ah, Lucifer! dikh numa
Palpale, pe amari phuv, anglunes e
Luludyi xasajlas andaj jaka,
Pala kodo le vecheske patra;
O mishto pinzhardo than, aba
Pustipe dichol, haj shushope.
So shukar sas, sogodi xasajlas.
Abakanak o plaj kerdyol, gludija,
Strafime ajero, kothe tele ando
Milno, sunto shajipe shajil e
Prostojka, taj grozojpe, ke che
Prikezhimaski kerdyol.
O bungardo samudro biagorunoj.
Kaj, kaj das? sar surro kotor tordyol
O oblo, savo vulume hamilpe
Mashkar milji amal, taj kodi sas
Amari intrego luma. Oh, Lucifer,
Palakodo, voj, taj voj - - trubuj vi
Lake te asholtar amendar? - -
LUCIFER
Ando amaro hurajipo, iva,
Anglunes e shuk xasajvel, palal
O baripe, e zor, zhi na ashol
Amenge kaver, sar shudro materi. -
ADAM
Le cherhaja palame ashontar,
Taj na dikhav vortape, chi glosh.
Bi kamimo, bi zuripe, so moll
O trajo. O shil tinzojma, Lucifer!
LUCIFER
Ta, zhi kathe te inkerdas tyi vityaz,
Zhas palpale, ando praho te khelas.
ADAM
Kon phenel kado? zha angle, angle:
Numa zhi kothe dukhal, zhi shindyol,
So kaj e phuv phandel, sako shelo. -
Ahaj, soj kado, muro dyih kikidyol,
Muri zor mukel man, godyi hamimej,
Maj but avla paramichatar Antaios,
Kon zhi kattyi trajisardas, zhi
Phuvasa unzujlaspe?
LA PHUVAKE BUZHESKI VORBA
Ova, maj buti kathar paramicha,
Tu pinzhares man aba, la phuvake
Buzhes, numa me phurdav ande tute,
Kathej o agor, zhi kathe sima zor,
Zha palpale, zhuves - ushtyav perdal,
Khanchisajves, sar kermo, savo andej
Pity paji furcilpe. - Pity si e phuv tuke. -
ADAM
Na mukav tuke, iva daraves man,
Mro trupo shajke tyiroj, o duho
Muroj, o gindo, taj o chacho bi
Agoreskoj, maj sig sas sar tyi luma.
LA PHUVAKE BUZHESKI VORBA
Kovlo manush! zumav, andre meres.
Maj anglunuj, kathar e luludy e sung,
Mosur kathar o trupo, taj khamester
E raza? Oh, te dikhesas, tyo gero
Dyih, ando biagoripe te hural,
Sar godyaripe, taj phenipe, rodel
Iva, ande streno luma, taj nichi
Hatyarel majbut khanchi, grozosastu.
Ke sako opre xutyilipe taj
Sako hatyar, so andetute kikidyol,
Numa avri razajvel, anda kaj
Grupuno materi, kas phuvake
Akhares, taj savi, kaver te avlas,
Nashtig avasas majbut, tusa kethane. -
O shukar, zhungales, e voja e
Rokovina, numa kathar muro buzho
Lan les tuke, savo tye cine
Themeske uzhimo sikavel perdal. -
Oh, so kathe o biagoruno
Chachimo, andek kaver luma shaj
Nashtig, taj o nashtig chachoj.
Pharipe naj, trajo na mishkil,
So kathe ajeroj, kothe gindoj,
So kathe abdyopej, kothe shajke
Glazoj, na barol, so kathe barol. -
ADAM
Chi zalis man, mro duho, opre phagel. -
LA PHUVAKE BUZHESKI VORBA
Adam, Adam, o paluno minut
Pashol: zha palpale, pe phuv baro
Shaj aves, ke anda sogodeski
Angrustyi tyo trajo avri shines,
O Del na mukel te pashos leste. -
ADAM
Gindis ke chi rumuja o merimo? -
LA PHUVAKE BUZHESKI VORBA
O phuro xoxajimo e koleski
Vorba, na phen, na phen, kathe
Ande buzhaki luma, intrego
Arakhadyimo grozojas lestar. -
Sunto somnoj kodo, o Del
Peske araklasles. E zhanimaski
Phabaj chi phaglas les opre.
ADAM
Maj me opre phagav.
(Majdur huran. Adam jekhe vatyipesa morcojpe.)
Gataj mange!
LUCIFER (asandos)
O phuro xoxajimo. -
(Sar e Adam os pizdas pestar.)
Kaj papush Del, aba shaj krujil
Ando cheri, sar nyevi cherhaj, savi
Pale mange anla nyevo trajo. -
LA PHUVAKE BUZHESKI VORBA
Sigo loshas inke Lucifer!
Numa unzilas kaj e streno luma,
Nashtig phagen avri anda muro them. -
Themeski gilji akharel, trazontu!
ADAM (trazondes)
Trajil pale. - Hatyarav ke muchij
Ba, vi o muchijipe gugloj mange,
Kasavo nasuli te khanchisajvav. -
Oh, Lucifer! inger man tele pe phuv,
Kaj kasavo but mardoma iva,
Maroma pale, taj baxtalo avo. -
LUCIFER
Pala katyi zumav, kodo gindis,
Ke tyo nyevo zurin na avla ive?
Taj reses vorta? Chaches, kasavo
Shavoripe numa manushes si. -
ADAM
Man chi moll kasavo gindo,
O vorta zhanav, zhi shelvar chi
Resavles. Chi mol khanchi. Soj kodo?
O vorta, nacharel o lasharimo,
O vorta, merimoj, a trajo zurin,
Taj e manushesko trajo zuripej.
LUCIFER
Chaches ke shukar hodinaj, te avlas
Barem, baro e zurinesko buzho,
Ta tehara prasas, anda sost adyes
Marestu, shavoripe sas, so
Zor, dastut. Chi sikavel tuke o
Khaeroneia slobodija, taj
O Konstantin na marlape palal,
Te avel lesko intrego luma?
Chi xasajlan, sar patyamno vityazi,
Taj maj pala, chi phaglan o patyape?
ADAM
Chaches, chaches, ba, sa jeksi, shaj sas
Nasul muro buzho, atunch inke zor
Delas man, vazdas man, kade sas sunato
Buzho. Sa jek sas, trushul vaj zhanipe
Slobodija, vaj barimaske das pema,
Angle ingerdas le manushipes. -
Oh, palpale pe phuv, te maravma. -
LUCIFER
Taj bisterdan aba zhanareski
Vorba, kon opre ginadas, ke shtar
Milli bersh pahoj luma, zurin tordyol?
ADAM
Tena tordyola angle o zhanipe.
Ba, angle tordyola, hatyarav, zhanav. -
LUCIFER
Dapol? - si zurinipe, baripe,
Zor, and xoxamni luma, so e godyi
Lashardas andaj teorija,
Haj so tu shaj dikhlan majintig. -
ADAM
Numa muntun e phuv - nacholtar
Vi kodi, sar sogodi, so andre
Pherel o trajo, taj atunchpale
Opre del o buzho, so trajophurdel
Pelest. Inger man palpale, phabav
Te dikhav, pe muntume phuvsosko
Nyevo sityipe dela man zor. -
LUCIFER
Zha palpale!